Góðan daginn,

Lýðræði er merkilegt hugtak. Lýðræði virkar þannig að almenningur kýs ákveðna einstaklinga / flokka til að taka erfiðar ákvarðanir fyrir restina af fólkinu. Fólk er að sjálfsögðu ekki alltaf ánægt með ákvarðanir sem teknar eru enda eru skoðanir fólks eins margar og fólk er margt. Ástæðan fyrir því að lýðræði virkar svona er að almenningur hef ekki tíma eða tækifæri til að kynna sér allar hliðar mála á meðan við gerum þá kröfu til stjórnmálamanna að þeir geri það og ef þeir kalli til sérfræðinga til að hjálpa til við að halda þeim upplýstum.

Núna um helgina var dæmi um það þegar stjórnmálamenn þorðu ekki að taka ákvörðun og settu mál í atkvæðagreiðslu. Í Hafnarfirði var þátttakan í atkvæðagreiðslunni um framtíð Alcan 80%. Ég hugsa þó að aðeins 10% af þeim hafi kynnt sér málið, kosti, galla og áhrif til þrautar. Hin 90% hafa verið fyrirfram mótaða afstöðu, af tilfinningalegum eða persónulegum ástæðum. Að þessum forendum gefnum hafa í því í raun aðeins 8% Hafnfirðinga tekið upplýsta ákvörðun fyrir sínu atkvæði.

Þess vegna finnst mér mjög bjánalegt að fara með einstök málefni í kosningar. Stjórnmálamenn eiga að hafa alla burði til að taka þessa afstöðu, annars hefðum við varla kosið þá og hey, ef okkur finnst þeir ekki standa sig kjósum við þá einfaldlega ekki aftur næst.

Ég veit að í þetta sinn var ég ósammála niðurstöðu kosninganna og því enn meira andvígur kosningunni. Ég veit því að dæmið gæti snúist við en þótt málið hafði farið á minn veg er ég samt á því að svona mál eigi ekki að fara fyrir fólkið, því staðreyndin er að oft þarf að hafa vit fyrir fjöldanum.

Nóg um þetta í bili,

Guðmundur Ingi Þorsteinsson